0 comentarios 
Tendencias XXII Pontus Veteris: fin dun ciclo | XXII Pontus Veteris: fin dun ciclo |
|
|
|
| Escrito por Emma | |
| Martes, 16 de Setembro do 2008 | |
|
Pontus Veteris, a até hai uns meses única pasarela de moda galega, celebrará esta noite a súa XXII edición. Seis prestixiosas marcas amosarán as súas propostas para a próxima tempada Primavera-Verán nun evento que xuntará a unhas 2000 persoas e que será retransmitido pola TVG. Creada en 1997 coa intención de converterse nun escaparate da nosa industria téxtil e nun referente do deseño e a confección galega, Pontus Veteris espera pechar hoxe unha traxectoria xa consolidada para deixar paso a un proxecto moito máis ambicioso, SEIMOGA (Semana Internacional da Moda Galega), unha nova convocatoria que aspira a ser a cita obrigada para todos aqueles profesionais que queiran coñecer as últimas tendencias da moda galega e cuxa primeira edición está prevista para a vindeira primavera.  Organizada pola Cámara de Comercio de Pontevedra, a Pasarela Pontus Veteris transformouse en 1999 ao trasladarse ao Recinto Feiral, onde se celebrou dende entón, ao tempo que empezaba a convocar as súas dúas citas anuais (en febreiro/marzo, amosando as tendencias outono-inverno, e en setembro, amosando as coleccións para a tempada de primavera-verán). Paralelamente, a Pasarela foi abríndose ao exterior, convocando a empresarios e prensa especializada doutros países na procura de novos mercados para o noso téxtil.  Para esta fin de etapa, como xa é habitual na pasarela, a organización quixo contar cunha figura de gran proxección mediática, unha top model convidada que pechará cada un dos seis desfiles; nesta ocasión a elixida foi María Castro (Vigo, 1981), modelo e actriz moi coñecida polo público galego polo seu papel na serie Pratos Combinados e que actualmente goza dunha gran popularidade en toda España pola súa personaxe de 'mala' extremadamente cobizosa na famosa serie Sin tetas no hay paraíso. María Castro será a nova embaixadora da moda galega e da pasarela, tanto nos seus respectivos traballos como nas súas aparicións públicas, como no seu momento o foron Eva González, Juncal Rivero, Anne Igartiburu, María José Suárez, Estafanía Luyk, Vanessa Romero ou Inma del Moral. Outros dezaoito mozos e mozas modelos participarán nun desfile cuxa escenografía foi creada polo coreógrafo Manuel Fernández e que recreará a Atlántida nun ambiente onírico no que se darán cita elementos que acentúen o surrealismo e a fantasía. Mon Santiso, un ano máis, será o encardo de presentar a gala.  A marca Charoa adicará o seu desfile a Majanje Pardo Andrade, coordinadora do evento dende a súa fundación, cunha colección inspirada nela que amosará unha muller elegante, soñadora e enigmática cando se viste de azul turquesa, azul mariño ou azul noite; brillante cando aparece iluminada polos laranxas ou o rosa; e sedutora cando sorprende acompañada do blanco e o negro. Baixo o título El Arte de ser tú misma, os deseños dialogan cun dos poemas galegos de García Lorca (Madrigal á Cibdá de Santiago) e coas pinturas do artista Alfonso Costa, engadíndolles un valor que só a sensibilidade sabe medir. A nova colección de Florentino, pola súa banda, inspírase no período de entreguerras con traxes que mesturan a pegada deixada pola xastraría artesán con cortes limpos que conxugan o bo vestir e a liberdade de movementos. Unha colección para un home con sensibilidade que busca as súas raíces a través da moda sen renunciar a un toque de vangarda. Montoto presentará unha colección estruturada en tres motivos: Fondo Mariño, que lembra en formas e cores a beleza das profundidades mariñas, integrada por unha infinidade de matices do azul; Xardín Botánico, que idealiza a natureza e tenta recuperar o seu colorido e sutileza; e A Vida en rosa, que rouba prendas do armario masculino para transformalas en delicados básicos femininos.  Toypes convida a mergullarse no mundo das pin-ups, botando man do erotismo e do glamour como unha nova e provocativa forma de entender a moda. Estas modelos cuxas fotografías figuraban en almanaques, portadas de revista e publicidade, popularizáronse nos EEUU dos anos 40, e agora son o eixo dunha colección cuxa prenda estrela é o vestido e cuxo protagonismo recae por igual nas mulleres fatais e nas lolitas. Mentres, María Mariño divide a súa proposta entre o branco, cor atemporal e sinónimo do elegante, feminino e tremendamente 'chic', e as cores impactantes como o rosa chicle ou os verdes e amarelos chamativos, así como momentos 'náuticos' nos que as raias mariñas son as protagonistas.
Finalmente, a firma ourensá Araujo presentará unha colección de pel para a primavera-verán 2009 con dous estilos perfectamente marcados: a sobredose de cor, contaxiada da arte urbana, e as siluetas desestruturadas que dan liberdade e comodidade ao movemento. Favorito Bookmark Enviar a... Visitas: 186 Comentarios (0)
 Escribir comentario
Tes que estar logueado para escribir un comentario. Podes rexistrate se non tes xa unha conta creada.
|
|
| Última actualización ( Martes, 16 de Setembro do 2008 ) |
RSS dos comentarios
| < Ant. | Seg. > |
|---|
