Segundo a Asociación Internacional de Vulcanoloxía e Química do Interior da Terra, na actualidade hai máis de 1.500 volcáns activos no planeta. Entre as zonas máis activas atópase a das Azores, a de Islandia, a do Mar Vermello, o cinto de fogo do Pacífico, a asiática, Hawai ou as Illas Canarias. Os países que contan con estas marabillas da natureza no seu patrimonio viron nelas unha inmellorable fonte de ingresos e abriron rutas e itinerarios con extensas programacións para impulsar o turismo volcánico, un xeito diferente de viaxar que está en apoxeo até o punto de que un volcán activo e a piques de estoupar xera automaticamente un novo mercado potencial de turistas. 

Afastado do turismo máis convencional e especialmente dirixido aos amantes da natureza, a ciencia, o deporte e a aventura, o vulcano turismo converteuse nun destino cada vez máis solicitado por aqueles viaxeiros que andan na procura de experiencias 'alternativas'. E é que os volcáns activos se encontran, sen dúbida, entre os lugares máis fascinantes e 'vivos' do planeta: malia estar controlados por equipos de científicos que afirman que o risco é moi baixo, os que se atreven a visitar as súas 'bocas' experimentan o choque de sensacións que producen estas fermosas pero destrutoras paraxes. Camiñar sobre o lume sentindo o latexo da terra baixo os pés é, din, unha vivencia incomparable pero non apta para medosos.

 

No norte de Tanzania atópase o Ol Doinyo Lengai , que roza os 3.000 metros e en cuxo cráter, segundo os Maasai, vive o deus Lengai; afastado das rutas turísticas habituais, a súa ascensión realízase pola noite para fuxir da terrible calor que vai na zona durante o día.

 

Comentarios (0)

RSS dos comentarios