¿É un sintonizador Wi-Fi? ¿Unha radio? ¿Un reloxo espertador? ... Nabaztag é todo isto e moito máis, a Nabaztag sóbranlle aplicacións <<Mido 23 cm, movo as orellas, canto, falo e o meu corpo ilumínase e latexa con centos de cores. Grazas ao Wi-Fi, estou conectado permanentemente a Internet.. Eu serei  o teu  acompañante persoal. Eu indicareiche por exemplo que tempo vai ir mañá, os problemas de tráfico ou se o IBEX35 baixa ou sube. Todo isto podo facelo discretamente con cores ou movementos de orellas. Pero tamén o podo facer por medio de música ou de palabras.

Pero iso non é todo... grazas a min, os teus amigos van poder comunicarse contigo dunha maneira inédita: por Internet, por SMS, por teléfono ou por mail, eles poderán enviarche mensaxes, música,  arquivos MP3 ou moito máis que eu che repetirei ou lerei, que eu che cantarei ou bailarei. Os teus amigos deixarán de estar agochados no fondo do teu ordenador ou do teu teléfono para tomar corpo na túa casa baixo a digna forma dun coello. E aínda hai máis... a era dos obxectos intelixentes apenas acaba de comezar, ti poderás descubrir e inventar cada día novas funcións útiles, fútiles ou sutiles>>

Efectivamente, Nabaztag explicouse á perfección: entre as súas múltiples funcións o coello ofrece información continua do estado do tempo, tráfico, bolsa, calidade do aire ..., é espertador, radio, reloxo parlante ou alerta de mails; é ademais un eficaz mensaxeiro que pode ler os teus SMS, correos electrónicos ou mensaxes vocais cun impresionante despregue de medios, movendo as súas orellas, cantando e iluminando a súa barriga. Le novas en tempo real dende calquera web (RSS), le textos en voz alta en 16 idiomas, español incluído; pestanexa, move as orellas, canta as túas cancións favoritas e lanza comentarios ocorrentes se o configuraches para sorprenderte.

Nabaztag/tag reproduce practicamente calquera contido dispoñible na web, fálao, cántao, represéntao e até o baila. Conéctase mediante un dispositivo Wi-Fi, pero non é un aparello dependente do ordenador, xa que está permanentemente conectado, vive na rede, mesmo cando o ordenador está apagado. Case todas as súas funcións son personalizables na página web da comunidade Nabaztag, onde debemos rexistralo, bautizalo, elixir o seu sexo e a súa 'personalidade'. Ten dúas opcións de funcionamento: unha de balde e a outra de pago; a suscrición permite o envío ilimitado de mensaxes e recibir os RSS de calquera web, mentres que na versión básica ambas as dúas características están restrinxidas.

Pero o máis interesante é a posibilidade de xerar as túas propias aplicacións (API), programando e activando o coello a través dun servizo externo e compartindo eses contidos orixinais coa comunidade. É o mundo dos Nabcasts, canles temáticas creadas por Nabaznautas con xogos, poesía, efectos de son, humor, música ... que facilitan a interacción entre Nabaztags ... pois os Nabaztags relaciónanse entre si chatean e comparten todo tipo de información... Velaquí dous Nabaztags bailando e imitando unha das secuencias máis famosas de Pulp Fiction:

E se o que che preocupa é a aparencia externa do teu coello, Violet tamén pensou niso, e lanzou máis dunha ducia de orellas que podes mercar a parte para mudar o seu estilo. Mais se iso non é suficiente para ti, aínda  existe una terceira versión, unha edición limitada: o Nabaztag by André, unha auténtica icona pop creada polo artista parisino André ... iso si, o prezo é case o triple.

Comentarios (0)

RSS dos comentarios