Unha estudante galega da Universidade de Santiago de Compostela (USC) desenvolveu o deseño dunha aplicación informática pioneira en España, denominada Forecasting, capaz de realizar predicións a curto prazo sobre o movemento das accións no mercado bursátil.

Trátase dunha novidade total no ámbito financieiro español que permitirá sentar as bases para poder realizar unha aplicación capaz de competir con éxito neste campo. A idea xurdiu dunha estudante de Enxeñería Técnica en Informática de Sistemas da USC, María Dolores Corzón, que a desenvolveu no seu proxecto de fin de carreira permitindo abrir unha nova liña de investigación no grupo de sistemas intelixentes da USC.

Forecasting organiza as noticias financieiras publicadas nas versións on-line dos principais diarios económicos, e a continuación analiza o seu contido mediante técnicas de intelixencia artificial de filtrado semántico,  o que permite recoñecer a información máis relevante que pode afectar ao valor dunha determinada acción en bolsa. O uso de técnicas intelixentes resulta necesario debido ao volume inxente de información dispoñible, que pode alcanzar as 300 noticias cada hora, así como para poder levar a cabo unha selección fiable desa información.