O pasado día 12 presentouse oficialmente a terceira edición do Concurso Universitario de Software Libre, que comprenderá o curso 2008/2009 e inclúe o desenvolvemento de software, hardware e documentación técnica libre.

O certame está dirixido a estudantes de primeiro e segundo ciclo do ámbito estatal español e ten como principal obxectivo fomentar a creación e contribuír á consolidación da comunidade de Software Libre no ámbito universitario. Así,  os proxectos inscritos serán liberados a través da Forxa de Coñecemento Libre da Comunidade RedIRIS e daranse a coñecer nun blog, onde os participantes contarán a súa experiencia no desenvolvemento dos proxectos.

A fase de inscrición no concurso comezará o vindeiro 15 de setembro e permanecerá aberta até o 10 de outubro de 2008. A formalización da mesma realizarase a través da web do evento.

Na mesma liña mantense tamén aberto até o vindeiro 31 de outubro o prazo de inscrición para participar no Premio ao Mellor Proxecto Fin de Carreira con Software Libre en Galicia .

Este galardón, organizado pola empresa galega Igalia co respaldo da Consellaría de Innovación e Industria, a través de Mancomún, así como das tres universidades galegas, réxese polos mesmos principios que o Concurso Universitario de Software Libre pero restrinxindo a participación a proxectos de fin de carreira e do ámbito galego.

A Forxa de Mancomún será un ano máis o punto de confluencia de todos estes proxectos en código aberto.