Os nosos viños non só conquistan polo seu 'padal', senón tamén polo seu deseño. Así o demostra Paco&Lola 2007 un Albariño da Denominación de Orixe Rías Baixas que se fixo coa Medalla de Prata no concurso Packaging Design 2008 celebrado no marco de Los Angeles International Wine & Spirits Competition. En concreto, Paco & Lola 2007, elaborado pola Sociedade Cooperativa Vitivinícola Arousana, conseguiu o trofeo na categoría de Deseño Contemporáneo. Amais, a calidade do viño tamén foi recoñecida neste certame cunha Medalla de Bronce.

Paco&Lola 2007 é un viño branco 100 % Albariño que procede de 200 hectáreas de vides en Meaño, no corazón do Val do Salnés, unha zona que está considerada 'o berce' do viño Albariño.