O Forum Nokia puxo en marcha Calling All Innovators, un concurso global que desafía a todos os desenvolvedores de aplicacións móbiles  a crear novas ferramentas que melloren o uso destes dispositivos en situacións do mundo real e nunha das tres categorías seguintes:

•    Ecodesafío: A aplicación deberá minimizar o impacto no medio ambiente e ofrecer solucións móbiles que axuden aos clientes a tomar decisións responsables co equilibrio ecolóxico, por exemplo reducindo o consumo de enerxía ou a pegada carbónica.

•    Mercados en desenvolvemento: Esta categoría convida a imaxinar as posibilidades de crear aplicacións e servizos pioneiros que afecten positivamente as vidas diarias de millóns de persoas nos países en desenvolvemento. Pode incluir solucións para a educación, para o acceso á información de saúde, a agricultura rural ou calquera outra aplicación que mellore as vidas dos mercados en desenvolvemento.

•    Vitrina de tecnoloxía: É unha oportunidade para crear e expor aplicacións contundentes que abran a mente dos consumidores sobre o que se pode facer cun móbil.

Os gañadores do primeiro premio en cada categoría recibirán 18.000 euros, unha viaxe ao Congreso Mundial de Telefonía Móbil 2009 en Barcelona, e distribución de balde da súa aplicación a través de diversas canles de Nokia. Os gañadores do segundo premio recibirán 7.500 euros, e os do terceiro, 3.500 euros. Todas as aplicacións a concurso deberán presentarse antes do 15 de decembro de 2008. Os finalistas faranse públicos en xaneiro do 2009.