Hewlett-Packard Española (HP), o Centro de Supercomputación de Galicia (Cesga) e as Universidades de Santiago de Compostela (USC ) e A Coruña (UDC) asinaron un acordo para colaborar en proxectos punteiros para o deseño e a creación de produtos innovadores.

Para iso, HP investirá medio millón de euros no desenvolvemento de dous proxectos de investigación realizados por científicos das dúas institucións académicas galegas e os laboratorios da empresa, actualmente a compañía tecnolóxica máis grande do mundo.

Durante a sinatura do convenio de colaboración, o presidente e conselleiro delegado de HP Española, Santiago Cortés Monedero, falou do <<alto grao de compromiso>> da empresa coa comunidade investigadora española. Resaltou igualmente a necesidade de potenciar os centros de supercomputación españois como núcleos de atracción para as empresas e eixos da investigación tanto pública como privada e expresou o seu desexo de <<seguir traballando co Cesga no futuro>>.