Cadrando co 25 de xullo, Día de Galicia, naceu HELLOgalicia - modo de vida galego, un boletín mensual que achega información turística sobre as principais cidades galegas e que quere converterse nun referente neste ámbito. A versión en papel é unha publicación mensual, dunha soa folla , tamaño xornal e de carácter gratuíto que inclúe catro seccións: mercar, comer, durmir e visitar. Pero ademais HELLOgalicia permite a participación dos lectores a través dun blog onde se pode opinar e valorar as propostas e recomendacións do boletín.

Impulsado pola empresa amano comunicación, o boletín distribúese de momento na Coruña, en Vigo e en Santiago de Compostela e ten unha tiraxe inicial de 25.000 exemplares. Segundo a empresa de comunicación galega, que xestiona dende hai cinco anos o boletín semanal electrónico HELLO e máis o programa radiofónico Gente Viajera de Galicia en Onda Cero, a partir dos próximos números iranse engadindo novas cidades aos puntos de distribución, que se complementarán con edicións locais en cada unha delas.