O afamado científico Stephen Hawking chegou onte a Santiago de Compostela, onde recibirá o vindeiro sábado o I Premio Fonseca 2008 de divulgación científica. A presenza de Hawking na capital galega está desencadeando un auténtico rebumbio mediático, pois tal e como publicaba onte La Voz de Galicia, o científico británico foi recibido <<como unha 'estrela da ciencia', entre a admiración de universitarios, turistas e peregrinos>>.

Logo de ser recibido tamén polo alcalde compostelán, Xosé A. Sánchez Bugallo, o experto en física teórica de 66 anos percorreu na súa cadeira de rodas un tramo simbólico do Camiño de Santiago até a Praza do Obradoiro, onde tamén visitou a catedral.

Stephen Hawking reunirase mañá mércores con investigadores da Facultade de Física da USC, o xoves desprazarase até Fisterra e o venres presentará a tradución do seu último libro, La clave secreta del universo. Una maravillosa aventura por el Cosmos, no Instituto Rosalía de Castro de Santiago. Xa o sábado, e logo de recibir o I Premio Fonseca, concedido polo Programa Conciencia que apoian conxuntamente a Universidade e o Consorcio de Santiago, pronunciará unha conferencia titulada 'Saíndo dun buraco negro'.