Caixanova vén de conceder as súas Becas Talento a seis mozos e mozas recén licenciados, cuxo importe total ascende a 150.000 euros. Os demandantes tiveron que pasar por varias probas de selección para demostrar as súas capacidades e aptitudes.

Os seis candidatos que obtiveron unha das Becas Talento Caixanova son: Fernando Castro Domínguez, Damián Escudero de la Fuente, Patricia Fernández Liz, Luis Guillot Gómez, Artur Kurnicki e Eva Losada Barreiro, que cursarán a modalidade a tempo completo do MBA da Escola de Negocios Caixanova, percibirán unha dotación económica mensual e terán a posibilidade de realizar prácticas durante un ano na entidade financieira. Cada unha das becas outorgadas está valorada entre os 21.000 e os 26.000 euros.

O proceso de selección realizouse a través de probas tipo test e de entrevistas, que nalgúns casos tiveron que realizarse a través dunha vídeo-conferencia, xa que uns vinte solicitantes procedían de países coma Reino Unido, Bolivia, Arxentina, México ou Polonia, entre outros.

O obxectivo do programa de Becas Talento Caixanova é facilitar aos mellores estudantes o acceso ao mercado laboral, aportándolles ademais unha formación de calidade. Así, esta iniciativa é un recoñecemento á mocidade que fai do esforzo académico e da superación persoal as bases do seu éxito.