"Quitando ocasións moi puntuais ó longo da historia, a colaboración existente entre o audiovisual galego e o portugués foi máis ben reducida. Para fomentar as relacións entre a imaxe galega e a portuguesa deseñouse o Filminho, un punto de encontro entre ambos audiovisuais xusto a ambas ribeiras do río Miño". Este é o resumo do espírito da primeira festa do cine galego e portugués que se celebrará en Vila Nova de Cerveira e Tomiño dos días 22 ó 27 de xullo. Pero Filminho nace non só para exhibir as películas a concurso, senón tamén co obxectivo de incentivar a creación e producción dos filmes realizados en Galicia e Portugal. A súa principal misión "é a reconciliación do público coas súas cinematografías nacionais".

 

 

Unha das principais características do Filminho é a exhibición de películas ó aire libre, usando un sistema innovador e aproveitando o ambiente de verán que se vive no Miño nestas datas. Ó ser un evento transfronteirizo, a festa do cinema galego e portugués será desenvolvido en Vila Nova de Cerveira e Tomiño, dous concellos unidos por unha ponte e que posúen equipamentos culturais complementarios. Os principais escenarios nos que terán lugar ás proxeccións serán o Auditorio Municipal de Cerveira, que se caracteriza por estar ó aire libre e no que se realizará a Gala de Apertura  e espectáculos nocturnos e o Auditorio de Goián, en Tomiño. Este espazo é unha sala de proxección clásica e na que terán lugar as exhibicións oficiais.

 

 

Estas proxeccións dividiranse en tres categorías competitivas. A primeira é o Grande Premio Filminho, no que se admiten filmes de calqueira xénero, pero de producción galego-lusófona. Se premiarán as obras máis innovadoras feitas por xoves creadores. O segundo dos apartados é Obras Miñotas, no que participarán filmes da primeira categoría, que foran realizados nas comarcas próximas, ben sexan incentivados por Filminho ou independentes. Por último e decatándose da proliferación de certames de cinema temático en Galicia e Portugal, o festival galego-portugués incluiu unha categoría, O mellor dos festivais, na que participan automáticamente cada un destes certames coa obra vencedora da súa anterior edición.  Ademais, haberá unha retrospectiva dun realizador aínda sen confirmar, a exhibición de clásicos do Miño e actividades nocturnas.

 

 

Dentro da programación de actividades do Filminho e, coa intención de reforzar a faceta turística da zona, todas as noites despois das proxeccións terán lugar espectáculos cinematográficos e musicais, como un filme-concerto homenaxe ó centeario do realizador Manoel de Oliveira para unha das súas películas mudas. Esta programación nocturna se realizará no Centro Cultural Goianés que, debido a sía disposición, tamén permite a realización de pequenos concertos e proxeccións. Paseos en barco polo Miño e visitas ós museos da zona son outras das actividades culturais previstas polos organizadores.

 

 

 

Pero as particularidades do Filminho van máis alá. Conscientes de que a producción audiovisual no Miño transfronteirizo "é case nula", a organización do certame creou o Fórum de Creadores, unha plataforma que pretende impulsar o talento e a creatividade audiovisual na raia. Entre os traballos presentados, o xurado seleccionará catro propostas ás que se lles dará 2.000 euros para a producción e gravación do proxecto.

 

 

 

Como remate das actividades programadas para incentivar a creación, programouse dentro do Filminho un curso de verán, en colaboración coa Universidade de Santiago de Compostela. Co título de Filminho 2008, o curso abordará o cine galego-portugués e as súas relacións.

 

Con todas estas iniciativas, os organizadores do certame esperan "que estas terras transfronteiriza traian outra frescura ó audiovisual galego e portugués, e que este conxunto de filmes sexan tamén outra oportunidade para coñecer e gozar das nosas imaxes e do noso cinema". Asi que xa sabes, este mes tes unha cita co cine galego-portugués.

 

Se queres ir quentando motores poder atopar máis información e vídeos promocionais na web do Filminho.