Hoxe ás 16:00 hs. estréase na Televisión de Galicia Redeiras, un documental de X.H.Rivadulla Corcón producido por Ficción Producións e maila TVG.

Este documental é unha homenaxe a todas as redeiras, que realizan un labor enraizado na esencia cultural de Galicia e se esforzan por dignificar o seu traballo, a través do testemuño das atadeiras de Cangas e das palangreiras de Malpica. Redeiras faise eco das reivindicacións deste gremio feminino que adoita ficar no esquecemento. Amais das protagonistas, Redeiras recolle as opinións do escritor Vázquez Pintor, e dalgúns patróns e armadores das nosas flotas.

Un importante exercicio de memoria e de xustiza histórica para coas mulleres que viven e traballan nos oficios da mar, a miúdo invisibles nun espazo tradicionalmente gobernado polos homes.