Quedan catro días. O 8 do 8 de 2008 ás 8 da tarde -hora chinesa- vai ter lugar a cerimonia de inauguración dos Xogos Olímpicos de Beijing. Tanto oito, como imaxinarás, non é ningunha casualidade: ese é o número da sorte en China e, polo xeral, en case toda Asia. E como de seguro tamén sabes, David Cal, unha das máis firmes apostas do deporte galego nestas Olimpiadas, será o abandeirado da delegación española na cerimonia, unha delegación que integran 294 deportistas, 167 homes e 127 mulleres. Cal convértese así, logo de que Gervasio Defeer lle cedese o posto, no primeiro galego e máis no primeiro piragüista que encabezará a expedición española nunhas Olimpiadas.

Mais David Cal encabeza tamén a nómina dos doce olímpicos galegos que competirán en Pequín. Unha ducia de campións, oito homes e catro mulleres, que representan ao mellor do noso deporte e que, na súa maior parte, son fortes candidatos a lograr unha ou varias medallas nas súas respectivas disciplinas. Queremos que os coñezas e que apostes por eles. .. Está en xogo unha Nintendo DS e máis outros agasallos.

A mecánica deste concurso é moi sinxela: propómosche unha porra, queremos que nos digas cáles destes deportistas lograrán unha ou varias medallas nos inminentes xogos. Non tes que adiviñar o número de medallas -xa que algúns destes deportistas compiten en máis dunha modalidade e polo tanto optan a máis dunha- nin concretar se será de ouro, de prata ou de bronce, só unha nómina de nomes (podes apostar por un, por dous, por tres, .... e así até por todos, mesmo por ningún). A única regra é a de toda porra que se preze: non se pode repetir aposta, é dicir, cada aposta ha de ser diferente á do resto dos concursantes.

Por suposto, no caso dos deportistas que compiten por parellas ou en equipos con outros deportistas españois, dase por sentado que se a parella ou o equipo gaña unha medalla, este ou esta deportista gaña unha medalla ... pero, ATENCIÓN, como os galegos Fernando Echávarri e Antón Paz competirán sempre xuntos en vela, os seus nomes han de ir sempre xuntos nas vosas quinielas coma se fosen un só, isto é, non é posible que un deles gañe unha medalla e o outro non ¿ok?  

O que acerte, levará unha Nintendo Ds, e se ningún ou ningunha de vós acerta coa nómina definitiva -agardamos que o máis nutrida posible- a desexada consola sortearase entre todos cantos participen. Amais, tamén imos sortear outros agasallos entre todos cantos nos den a súa nómina .... así que ¡xa estás tardando!: fagan as súas apostas nesta liña do FORO .

Os doce olímpicos galegos son: Javier Gómez Noya, Iván Raña, David Gómez, David Cal, Teresa Portela, Carlos Pérez Peruco, Sonia Molanes, Fernando Echávarri-Antón Paz, Santi Pérez, Sandra Aguilar e Tamara Abalde.

Como ves, as grandes opcións do deporte galego residen en dúas disciplinas: piragüismo e triatlón. En ambas as dúas, os nosos deportistas acadaron importantes vitorias nos últimos anos. En triatlón, o gran rival a bater vai ser Javier Gómez Noya; Campión Mundial sub-23 en 2003, Campión de Europa en 2007 e 2008, Campión da Copa do Mundo en 2006 e 2008 e Premio Nacional do Deporte Galego 2006/07, o ferrolán foi tamén o elixido polos amigos e amigas de NovaXove como o mellor deportista galego 2006/07: o seu afán de superación e o seu empeño xunto aos seus numerosos galardóns nun deporte tan duro e á vez tan descoñecido, convertéronno no voso indiscutible favorito. Mais tampouco hai que esquecer a Iván Raña; o de Ordes foi o primeiro triatleta galego que conseguiu un Campionato do Mundo e máis competir nuns Xogos Olímpicos, e aos seus 29 anos Beijing 2008 é, probablemente, a súa última oportunidade para acadar unha medalla olímpica.

Pero Galicia destacará, sobre todo, nos deportes náuticos. Catro son os nomes que nos representarán no piragüismo: por unha banda, David Cal, medalla de ouro e a medalla de prata nos Xogos Olímpicos de Atenas 2004 -nas categorías de 1.000 metros e 500 metros respectivamente- algo que non conseguira ningún outro deportista español con anterioridade, quen tentará repetir a fazaña logo de conseguir o pasaporte olímpico vencendo no Mundial de Duisburg; Teresa Portela e Sonia Molanes, pola súa banda, logo de clasificarse no Campionato de Europa, remarán xuntas an K-4 500 pero ademais Portela participará na proba de K-1 e Molanes en K-2 xunto a Beatriz Manchón; completa o equipo galego de piragüismo, despois de gañar a prata en K-2 500 xunto a Saúl Craviotto e en K-2 1000, Carlos Pérez Rial, que enfrontará en Pequín a súa segunda cita olímpica. Tamén en vela Galicia conta cun tándem campión, Fernando Echávarri e Antón Paz, segundos no ranking mundial  e unha das máis serias opcións ao podio tras imporse no Mundial de Portugal.

Xa no atletismo, o vigués Santi Pérez, repetirá nos 50 quilómetros marcha despois de clasificarse no oitavo posto en Atenas 2004, namentres que a luguesa Sandra Aguilar competirá en maratón logo de quedar terceira en Rotterdam, a primeira vez que partcicipaba nunha proba desta modalidade e na que obtivo a sexta mellor marca española de todos os tempos.

En deportes de equipo, a ferrolá Tamara Abalde fará parte do combinado feminino de baloncesto, unha selección de luxo que capitanea Amaya Valdemoro.

O decatleta David Gómez é o duodécimo e último deportista galego que competirá nos Xogos Olímpicos. Proclamouse a pasada fin de semana Campión de España na súa especialidade pero sofreu para lograr o pasaporte: conseguiu a mínima B por moi pouco - a Federación Internacional pedía 7.700 e Gómez, que xa se proclamara Campión de España en 2004,  puntuou 7.736.       

Comentarios (0)

RSS dos comentarios