Aínda que apenas hai unha década que se practica en España, o canicross é unha modalidade deportiva cunha forte implantación en Europa, existindo importantes campionatos de elevado nivel. É unha especialidade que garda certa proximidade co atletismo e cos deportes de montaña, pero ademais aporta un valor engadido aos seus afeccionados: o de correr xunto a un bo amigo, coma sempre o é un can, ao tempo que se goza da natureza. Home/Muller e Can conforman un atractivo binomio, pois persoa e animal corren sendo un equipo, o que implica traballar no entendemento e respecto mútuo. Amais, tal e como manifestan os que participan neste tipo de carreiras, as sensacións que se teñen ao correr tirado por un can son moi diferentes ás que se experimentan correndo só, sobre todo debido á achega de forza extra en subidas e chairas, así como á sintonía e ao forte vínculo que se establece entre musher e can.

 

 

O canicross é unha das modalidades do mushing (termo que engloba os deportes de tiro con cans) e acostuma practicarse case en exclusiva sobre terra -existe a variante sobre neve con raquetas, mais, dada a súa dificultade, a súa práctica é mínima-. Nel o musher corre cun can atado á cintura mediante un cinto, unha liña de tiro (corda de nylon elástica) e un arnés para o can (é altamente desaconsellable empregar un arnés de paseo, que podería mancar ao animal).

En España o mushing é un deporte con cerca de quince anos de tradición, se ben a modalidade de canicross é máis recente e foi introducida pola Asociación Española de Mushers  (que conta con máis de 200 asociados) en 1998 como categoría dentro das carreiras de cans de trineo. Comprometida coa divulgación e promoción de todas as modalidades deportivas derivadas do mushing, en 2005 a AEM pon en marcha o Primeiro Canicross de Cataluña, e foi, así mesmo, a promotora do Primeiro Circuito Estatal de Canicross  e da Primeira Liga Catalá de Canicross. Tamén foi a impulsora da afiliación á Federación Europea de Canicross . Arestora, pois, e grazas a este labor, esta especialidade xa conta co seu propio calendario de competicións por todo a xeografía española, deportistas federados e campións na modalidade.

En canto á súa práctica en Galicia, has de saber que a localidade pontevedresa de Rodeiro, situada no centro xeográfico do noso país, acolleu o pasado 16 de marzo a primeira proba galega puntuable para o Circuito Estatal Buff-Husse (á que fai referencia o vídeo desta reportaxe), unha carreira que congregou a uns 30 corredores que xa participaran en probas semellantes na Coruña ou en Padrón. O Circuito Estatal Buff-Husse de Canicross é unha competición inter-clubs a xeito de liga por puntos que consiste en trece probas, de entre 7 e 13 km, repartidas por toda España. Cada proba ten calidade de competición independente, coa súa clasificación e trofeos específicos, e suma puntos para a clasificación final do conxunto do circuito.

Xa por último, indicarche que se non te convence iso de correr podes formar equipo igualmente coa túa mascota practicando calquera das súas modalidades: o tiro con patinete, onde o musher vai de pé ou propulsando un patinete que vai enganchado a un ou máis cans; o bikejoring, cunha bicicleta de montaña; sobre vehículos de 3 ou 4 rodas, o carting, onde se emprega un maior número de cans que se enganchan igual ca nun trineo; o skijoring, sobre esquís ...etc.