As Federacións Galega e Española de Piragüismo  elixiron por segundo ano consecutivo á cidade de Ourense coma sede dun novo Campionato Europeo, neste caso de Freestyle. A competición vaise desenvolver no río Miño, baixo a ponte do Milenio, entre o 23 e o 26 de xullo.

En Ourense estarán presentes os representantes europeos máis importantes desta especialidade, pois está confirmada a asistencia dun total de 180 deportistas da República Checa, Francia, Inglaterra, Eslovaquia, Austria, Alemaña, Irlanda, Suecia, Finlandia, Polonia, Suiza, Portugal, Holanda, Andorra e España.  Os adestramentos oficiais van ter lugar o luns, 21 de xullo, e o martes, 22 de xullo, de 09:00 hs. a 14:00 hs.

A modalidade de estilo libre en piragüismo non é moi coñecida en España, pois comezou a practicarse hai uns sete anos. A nivel mundial, este deporte practícase nuns 50 países, sendo potencias Estados Unidos e Canadá, entre outras. O piragüismo de estilo libre é unha modalidade convidada nos vindeiros Xogos Olímpicos de Pequín e segundo o presidente da Federación Española de Piragüismo, é posible que pase a ser olímpica nos próximos xogos.