Mestalla gozou onte do bo fútbol do Valencia que marcou catro goles a un Deportivo que comezou dominando e acabou perdéndose no campo. Os galegos saltaron ó céspede controlando o partido, e os dez minutos chegaba a súa primeira oportunidade. Pablo Álvarez recolle o balón e envía un centro que é desviado polo valencianista Moretti, para que o coiro se cole na súa propia portería. Tras o gol, as oportunidades para os de Lotina seguían chegando. Pero o Valencia soubo aproveitar un erro defensivo e Mata igualou o encontro. A partir dese instante o ritmo do partido cambiou.

 

Logo do descanso, foi o Valencia o que dominou a segunda parte de principio a fin e, ó pouco tempo, Villa cóase pola banda esquerda, noutro erro defensivo dos visitantes e bate a Aranzubia, adiantando ó Valencia no marcador. Ante esta situación, Lotina deu entrada a Omar Bravo e Lafita. Pero os cambios non daban resultado e chegou o terceiro tanto do Valencia, obra de Joaquín. O partido estaba en mans valencianistas e no minuto 81, chegou o segundo tanto de Villa, que colocaba o marcador nun 4 a 1. Tres minutos despois, Lafita marcaba para o Deportivo o segundo gol, que non servía senón para por o resultado definitivo no marcador.