O Olivo Caixanova proclamouse onte campión da I Copa Galicia de fútbol feminino ao gañar ao Atlético Arousana por 0-2 na final do trofeo, que se disputou no campo de Santa Mariña, en Redondela. As viguesas, que partían como favoritas na final, dominaron o partido dende a primeira parte, aínda que o conxunto de Vilagarcía plantou cara e buscou con entusiasmo o empate.

Ao final do encontro a capitana do Olivo recolleu a Copa Galicia de mans da Directora Xeral para o Deporte, Marta Souto, namentres que a capitana do Atlético Arousana recolleu o trofeo de subcampión, entregado polo presidente da Federación Galega de Fútbol, Carlos Meana.

Para chegar a este partido, ambos os dous conxuntos tiveron que proclamarse vencedores dos seus respectivos grupos. O Olivo non tivo ningún problema para imporse aos seus rivais, mentres que o grupo B estivo un pouco máis axustado.