Despois da derrota sufrida na primeira xornada da copa da UEFA diante do Brann noruego, o Deportivo saíu onte ao céspede de Riazor ávido de gol diante do Mallorca. Así o demostrou dende os primeiros minutos, cun remate de cabeza de Joan Verdú no minuto 2. Pero os baleares non quedaron quedos e axiña o balón paseou diante da portería de Aranzubia logo dun saque de esquina que o Mallorca non soubo aproveitar. Ambos os dous equipos creaban continuas ocasións de perigo sen desfacer o empate.

Logo do descanso, os branquiazuis asumian a iniciativa e volvían a dar os primeiros sustos, esta vez cun tiro de Guardado que despexou o porteiro do Mallorca. Foi nesta segunda metade do partido, cando o colexiado se converteu no protagonista, primeiro ao expulsar a Omar Bravo logo dunha entrada ao cancerbeiro balear, despois sacando tarxetas amarelas a manchea e rematando coa expulsión do xogador do Mallorca, Nunes. Con dez xogadores en ambos os dous equipos, foi o Deportivo o que puido sentenciar mais finalmente o encontro acabou cun empate a cero.