Logo de catro xornadas, o Celta acadou o seu primeiro punto en Liga diante do Eibar en Ipurúa. O plantexamento de Pepe Murcia, con novas incorporacións no once titular coma Fajardo, Jonathan Villa e Juan Manuel Peña, deixaba ver as intencións do técnico celeste de saír a por todas. O encontro comezou forte, con ritmo, cun Celta que se deixaba ver na área rival, dando os primeiros sustos. O Eibar tentaba conter os ataques dos vigueses, ao tempo que procuraba chegar a área visitante, algo que non conseguiu até case o minuto 20. A falta de acerto amolaba ao Eibar que buscaba as faltas incansablemente na fronte da área. Co empate no marcador, chegábase ao descanso.

Na reanudación do partido, os celestes foron os que tiveron as primeiras oportunidades de desnivelar o resultado, sen embargo e ao pouco tempo, o Eibar comezou a presionar, procurando o erro do equipo visitante. Eran momentos duros para o Celta, que se vía acosado. Finalmente, os de Pepe Murcia recuperaron o control do encontro preto do final, aínda que só lles serviu para rascar un punto do empate a cero.