A cidade de Ferrol acollerá os vindeiros días 13 e 14 deste mes o Campionato de España de Triatlón. No acto de presentación do evento deportivo, que tivo lugar onte, o concelleiro de deportes, Manuel Santiago, manifestou que <<Ferrol ofrece unhas magníficas condicións para a desputa das probas, ao contar coa ensenada de Caranza, onde se nadarán os 1.500 metros; un espléndido entorno rural con contraste entre montes e montañas, por onde transcorrerán os 40 kilómetros da proba de bicicleta; e un barrio histórico como é o da Magdalena, no cal se farán os 10 kilómetros da carreira a pé>>.

No campionato participarán preto de 700 deportistas, a maioría deles de gran nivel, pois estará todo o equipo olímpico e todos os atletas internacionais de relevo;  en total serán máis de 1.500 as persoas que se despracen a Ferrol con motivo das probas.

Javier Gómez Noya, presente no acto, afirmou que se trata dun soño poder desputar un campionato así na cidade dun e que é unha gran ledicia comprobar como o triatlón deixou de ser un deporte descoñecido para pasar a atraer a centos de persoas. O deportista local sinalou ademais que dende o punto de vista técnico é un circuito moi atractivo para os competidores, e engadiu que pese a que ve complicada a súa participación a vindeira semana, por mor das molestias físicas que presenta, non dubida en que estará presenciando as probas en directo.