A nosa portada renóvase coa quinta tira de Davida, na que podes premer para vela ampliada. Davida, que inauguraba a sección este verán, é un dos dous membros de Fuck Comics, xunto a Ash, que colabora con NovaXove achegando semanalmente as súas viñetas.

David Amoedo (Vigo, 1984) adícase dende 2003 á ilustración, á banda deseñada e ao deseño gráfico baixo o pseudónimo de Davida. Amais de ser un dos oito membros fundadores de Fuck Cómics, onde publica banda deseñada, é coordinador do proxecto e encárgase tamén do deseño gráfico da publicación. Colabora ademais con outras  iniciativas coma o Despregable Fanzine, editado pola A.C. Embaixada Prusina, coa sección 'LA Cara B'; e co colectivo Xogo Descuberto, que desenvolve unha variada labor de crítica social e dinamización cultural, colaborando na súa revista de difusión gratuíta con viñetas e ilustracións. Davida participa así mesmo en exposicións colectivas e realiza con asiduidade deseños e ilustracións para cartelería e Cds de diferentes bandas da escena viguesa coma Saldos Arias, Noishock, Siervos de Nadie ou Aphonnic. É membro tamén do colectivo de teatro e títeres Troula.

O seu estilo cartoon está influenciado por autores coma  Bruce Timm, Javi Rodrigues, Jaime Hernández, Miguel Ángel Martín ou Mauro Entrialgo, e a súa temática caracterízase polo humor costumista, o gore e a Serie B dos 80s e 90s.

Fuck Comics é un colectivo vigués de estilo urbano e underground que edita dende 2006 un Fanzine co mesmo nome. Hoxe en día aglutina a máis de quince creadores, entre os 18 e os 30 anos, e algún dos seus membros, coma Álex Cal ou María Vilar, adícanse profesionalmente ao mundo do cómic e da ilustración. O fanzine ríxese por unha única norma: divertirse e divertir a partir dunha estética urbana, moza e cómica. Pode conseguirse en bares, en tendas de cómic e en librarías, e ademais das tiras de todos eles, inclúe unha sección musical con reseñas, Fucking Noise.