Compostela celebra a segunda edición do Roteiro de Creación Contemporánea, unha iniciativa que permite aos cidadáns adentrarse nos espazos de traballo dos artistas e máis nos centros de difusión das artes na cidade.

Ao longo de dúas semanas, e co obxecto de favorecer o diálogo entre os creadores de diferentes xeracións e estéticas e o resto da sociedade, vaise celebrar un amplo abano de actividades: xornadas de talleres abertos, galerías con apertura nocturna, instalacións, performances, videocreacións, visitas guiadas en varios idiomas, mail Art, pintura e estampación en directo ...

Este Roteiro quere ser una oportunidade para adentrarse no mundo dos artistas e coñecer o seu proceso creativo, as súas fontes de inspiración, as súas técnicas, etc. O mapa do mesmo, pódese descargar na web da iniciativa e serve para que os interesados e interesadas poidan guiarse na busca de talleres, galerías e outros espazos artísticos. Asemade, o espazo situado en Campo de Santa Isabel, cedido por un particular e que noutrora funcionou coma antigo almacén de cervexas ou curtiduría, é posto en valor estético por trece artistas con performances e intervencións a gran escala.

O programa de actividades tamén inclúe a creación dun mural colectivo chamado Debúxame Santiago, varias exposicións colectivas, a produción de proxectos específicos e cursos monográficos de banda deseñada, creatividade, mail art, arte e ecoloxía, etc. E para pór de manifesto a opinión do público asistente, tamén se propón a Operación Flechazo, é dicir, o público poderá asignar puntos a todos os artistas que visite nun formulario que atopará nos talleres e centros socioculturais e que poderá entregar no punto de información do Roteiro.