O XIV Salón do Manga de Barcelona, que se celebrará do 30 de outubro ao 2 de novembro en La Farga de L’Hospitalet, anunciou que nesta edición o Ministerio de Relacións Exteriores do Xapón, en colaboración coa Japan Foundation, convidará a Takamasa Sakurai e Michihiko Suwa para que falen sobre o presente e futuro da animación xaponesa. Ambos os dous, especialistas de renome e involucrados na industria do anime e a televisión xaponesa dende hai anos, estarán nunha mesa redonda que se celebrará durante a tarde do venres 31 de outubro.

Takamasa Sakurai, cunha ampla traxectoria nas industrias creativas, especialmente nas artes dixitais, destaca polo estudo da industria de animación xaponesa e o seu papel nas relacións exteriores do país. Logo de graduarse en Ciencia Políticas e Económicas na Universidade de Waseda, empezou a súa carreira profesional na editorial Koubunsha Co. e traballou como Director Xerente e Oficial Executivo en varias empresas do mundo dixital. Ademais, tamén foi profesor da Universidade Dixital Hollywood, produtor de videoclips de varios grupos de música xaponeses e actualmente de contidos.

Michihiko Suwa, pola súa banda, é produtor executivo de Nihon TV (Yomiuri TV), unha das televisións máis importantes do Xapón. Como produtor, logo de investigar qué demanda o público en materia de animación en cada momento, encárgase de planificar o desenvolvemento das series ou películas e de organizar a gran cantidade de tarefas necesarias para que estas poidan saír á luz. Polas súas mans pasaron series tan populares coma Yawara!, City Hunter, Detective Conan ou Black Jack. Tamén coordinou e planificou outras series destacadas coma Angel Heart, Yattaman, Inuyasha ou Kindaichi Shonen no Jinkebo.