O xurado da XVI edición do Premio de Poesía Espiral Maior elixiu como gañadora, por unanimidade, a obra Açougue do poeta portugués Amadeu Baptista, 'unha proposta de grande interese poético e literario que ilumina unha especie de crónica colectiva do pobo portugués'.

Nesta edición concorreron 206 traballos procedentes de Galicia, Portugal e Brasil. Dotado con 15.000 €, trátase do galardón de maior contía económica no conxunto da penísula, e un dos máis importantes de Europa. O gañador verá ademais a súa obra publicada na Colección de Poesía de Edicións Espiral Maior, cunha tiraxe de 2.000 exemplares.

Amadeu Baptista (Porto, 1953) é un dos poetas máis importantes da literatura portuguesa na segunda metade do século XX, con libros traducidos ao castelán, inglés ou francés. A súa obra mereceu, entre outros galardóns, o Prémio de Poesia e Ficção de Almada, o Prémio Nacional de Poesia Natércia Freire, o Prémio Internacional de Poesia Palavra Ibérica ou o Prémio Nacional Sebastião da Gama.