20.000 termos traducidos do inglés ao galego, cos seus correspondentes exemplos e diversas informacións gramaticais e de uso, compoñen a segunda edición do CLUVI, o dicionario inglés-galego máis completo do panorama actual. O proxecto presentouse onte na Facultade de Filoloxía e Tradución da Universidade de Vigo ao abeiro da celebración do Día Internacional da Tradución.

A principal novidade do dicionario radica na súa elaboración a partir dun corpus de traducións inglés-galego de dez millóns de palabras. Cada unha das acepcións das distintas entradas conta por iso cun exemplo de uso tirado dun texto real, xunto coas diversas informacións gramaticais e de uso.

 

No que a estrutura se refire o novo dicionario é moi semellante a unha obra tradicional. Inclúese ademais da categoría gramatical a referencia bibliográfica abreviada da fonte (obra e número de frase) e información fraseolóxica, así como todo o que se refire a locucións, frases feitas, refráns e americanismos. As habituais perífrases verbais en inglés teñen tamén un espazo importante no dicionario, e ademais tamén se inclúen termos novos ou termos especializados. O volume, que pode consultarse de balde na web, editarase a finais de ano.

Segundo explicou Xavier Gómez Guinovart, coordinador do proxecto, este dicionario é catro veces máis grande ca o resto dos dicionarios inglés-galego que existen na actualidade, e é froito do traballo desenvolvido durante os últimos dez anos polos investigadores do Seminario de Lingüística Informática da UVigo. Pero xunto ao dicionario, o grupo de investigación en Tecnoloxías e Aplicacións da Lingua Galega, TALG, presentou tamén o resto de campos nos que está a traballar, dende unha Neoteca  ou banco de datos de neoloxismos de libre consulta na web até a denominada Termoteca, unha base terminolóxica sobre máis de 10.000 termos que serve para que os usuarios saiban que vocabulario utilizan os expertos nun determinado ámbito.